Милениумски крст

Комисијата што завчера го посети крстот утврдила дека стабилноста на објектот е нарушена бидејќи нема хидроизолација на бетонските плочи, завртките на металната конструкција не се доволно затегнати, челикот ‘рѓосува, а не се заштитени ниту бетонот, ниту каблите за струја, кои можат да бидат опасни за посетителите... На состанокот што го одржале потоа, тие заклучиле дека ако наскоро не се отстранат овие недостатоци, објектот може да се доведе во опасност од уривање. Градските власти велат дека не можат да се вклучат во никакви активности околу Милениумскиот крст, затоа што објектот не бил во нивна надлежност. (Време)

Замислен како landmark на Скопје, но никогаш не го доби сјајот што му следуваше. Почнаа да го градат со задоцнување од две години, под изговор дека недостасуваат пари за неговата изградбе. Колку што се сеќавам, недовршен експресно беше пуштен во употреба пред парламентарните избори... Можеби и грешам.
Денес ништо од најавениот ресторант на две нивоа со панорамски поглед на Скопје. Ништо од платформата на која секој оној кој ќе се искачи на крстот ќе има можност да ужива во највисоката панорама на Скопје. Ништо од жичарата која треба да ги пренесува туристите директно до врвот на Водно.
Крстот остана како парчиња метал во жолта боја да штрчи над Скопје. Рестрикциите на струја му го намалуваат сјајот во ноќните часови. Куп ѓубре околу него како одраз на културата на луѓето од градот над кој стои. Опасен за љубопитните кои се качуваат по незаштитените скали.
За овој објект МПЦ и Фондацијата "Милениумски Крст" (па дури и Градот) треба нешто повеќе од декларативно се заложат. Можеби решение е давање на објектот под концесија на човек или фирма која е способна да инвестира за да го доврши и да стопаниува со него. Секое решение кое ќе ги помести работите од мртва точка е добредојдено. Скопје го заслужува овој објект.

Поглед на падините на Водно

Фотографирајќи го затемнувањето на Сонцето ги забележав овие расцветани дрва на падините на Водно.

Затемнување на сонцето

Една природна појава која секогаш побудува интерес кај сите жители на планетава е затемнувањето на Сонцето. Денес бевме сведоци на овој феномен. Месечината се испречи на патот меѓу Сонцето и Земјата со што предизвика благо замрачување. Појавата можеше да се забележи и од Скопје. Да не се појавеше облакот во времето на најголемото замрачување, верувам дека уживањето во глетката ќе беше уште поголемо.
Инаку, Скопското астрономско друштво секогаш се грижи за подобро доживување на ваквите појави. Така, за денешното затемнување во понеделникот организираше предавање на тема „Затемнувања на Сонцето и Месечината“, а денес на плоштадот Македонија организираше набљудување на затемнувањето со телескоп. Воедно имаат и повик до сите оние кои го набљудуваа затемнувањето на Сонцето да испратат извештај со фотографии кој ќе биде објавен на нивната страна.

Фотографирајте улични дупки и освојте автомобилски гуми

Ретко читам Време, а кога го правам тоа најчесто станува збор за онлајн изданието.
Денес налетав на една убава статија - можеби е нова, а можеби е и стара, но во секој случај интересна. Редакцијата на гореспоменатиот дневен весник распишува конкурс за најдобра фотографија на улична дупка. Најдобрите фотографии ќе бидат објавени на страната "Скопје". Наградата е добра (две автомобилски гуми), а останатите две веројатно вие ќе треба да си ги купите. :)
Значи, фотоапаратите (или мобилните) во рака и регистрирајте ја секоја дупка на улиците во Скопје. Можеби и ќе имате среќа да добиете две автомобилски гуми.

Фото од прославата на Прочка

Беше убав ден да се излезе, да се прошета низ Скопје и да се види настапот на неколкуте културно-уметнички друштва на платото пред Домот на АРМ (GoogleEarth) и Плоштадот (GoogleEarth).

Kонкурс за културни проекти

Градските власти минатата недела распишаа конкурс за изработка на проекти за реализација на културни манифестации. Во буџетот на Градот годинава предвидени се пари за финснсирање на манифестациите: Звуците на чаршијата, Денови на Јустинијан Први, Скопско лето, одбележувањето на годишнината од Скопскиот земјотрес на 26 јули, и пари за изработка на физибилити студијата "Заживување на Старата скопска чаршија". На конкурсот можат да учествуваат установи од областа на културата и правни лица што вршат културна дејност. (Вест)

Се надевам дека оние кои ќе конкурираат ќе имаат понуда на квалитетни проекти и дека оваа година Скопје ќе биде преполно со културни збиднувања, особено во летниот период, кога градот е полупразен и може спокојно да се ужива во културно-уметничките случувања.

Професија: вратар

Во четвртокот вечерта, пред ноќниот клуб "Тренд" кој е во состав на истоименото кафуле, во центарот на Скопје, се одвивала вистинска драма. Имено, група од четворица млади луѓе, се упатила кон клубот, каде на самиот влез ги пречекале вратари, кои одбиле да ги пуштат да влезат внатре. Кога едното од момчињата побарало објаснување зошто се одбиени, на ова вратарот му возвратил со навредливи зборови и пцовка, а наводната причина била приватната забава, која била во тек долу во клубот. (Идивиди)

Ваква е ситуацијата и по другите локали. Вашиот убав провод ќе зависи од расположението на некои луѓе кои од планина се симнуваат во град само за викендите и работат како вратари. Колку пати сте останале на ред на чекање при влез во некоја од скопските дискотеки и покрај тоа што немало гужва, туку вештачки се наметнала поради изживувачкиот однос на вратарите?
Верувам дека вратарите имаат свои проблеми, но има институции кои треба да ги згрижат. Би бил пресреќен кога ќе слушнам дека барем неколку од нив прочитале барем една книга после „Зоки Поки“.
Секоја чест на исклучоците, иако станува збор за многу мал процент.

Прочка

Од раскажувањето на моите родители (инаку стари скопјани) традиција било за христијанскиот празник Прочка луѓето да се собираат на скопското кале (GoogleEarth) облечени во народни носии. Но, во поново време, мислам дека таа традиција полека избледнува. Народните собири се слабо организирани и речиси и нема луѓе облечени во народни носии. Се израдував кога во разговор со еден мој другар добив информација дека токму утре, на Прочка, на скопското кале е закажан народен соби по повод овој голем христијански празни. Неможев да добијам повеќе информации за утрешниот настан, но сигурно ќе ги пренесам импресиите.

Кражба на скулптура

Во бркотница како на филм низ скопските улици, полицијата прексиноќа ги фатила тројцата крадци што неколку часа претходно "киднапирале" скулптура тешка 200 килограми од пред Музејот на современата уметност на Кале. Ја пресекле на половина, ја откорнале од бетонскиот постамент и ја однеле.

Вака почнува веста за кражбата на скулптура во сопственост на Музејот на современа уметност (GoogleEarth). Целата вест можете да ја прочитате тука. Неверојатно е колку предмети од уметничка и историска вредност се цел на кражба. Ми текнува на кражбата на една од надгробните плочи поставени во тревната површина пред Музејот на Град Скопје (GoogleEarth). Никогаш не дознав што се случи со неа, иако прочитав дека е невозможно некој во сред Скопје да украде стотици килограми тешка камена плоча без да биде забележан.

Необична (и сосема погрешна) навика

Се возев во "петнаеска" на пат накај Ново Лисиче. Откако ја помина автобуската станица популарно позната како Југодрво, го вперив погледот кон зградата на Народната Банка на Република Македонија, поточно кон облаците кои беа на синото небо (прекрасен сончев ден беше). Одеднаш, како автобусот ја поминуваше кривината кај семафорите пред НБРМ, на плацот кој пред неколку месеци беше продаден на "Веро" за да гради супермаркет, забележав една невообичаена глетка. Во средината на областа полна со ѓубре и ниска (внимавајте: ниска!) трева, еден човек решил да се ослободи од притисокот на неговата бешика. Во едната рака држеше најлонска кеса, додека со другата рака ја изведуваше операцијата "Олеснување". Без никаков срам, сред бел ден (околу 16:10 часот), на сред Скопје и тоа на отворен простор!!!
Разбирам дека во Скопје има недостаток од јавни тоалети. Јасно ми е дека проблем каков што имал главниот лик од оваа приказна е навистина деликатен и прилично незгоден. Но, решение какво што употребил кутрото суштество е тотално неприфатливо, малограѓанско, некултурно...
И, не е прв пат, а навистина не сум ниту единствен кој забележал уринирање на јавни места. Но, ова беше најлошото прекршување на етиката, на свеста и моралот на еден граѓанин на овој град. Без трошка срам (добога, тоа беше на широка отворена површина во сред Скопје) и образ да се уринира кај се стигне. И уште повеќе, во период на градскиот метеж, на еден убав сончев ден.

Jazz концерт

Прочитав една информација во Дневник дека вечерва во "Мала станица", со почеток во 22 часот ќе се одржи jazz концерт. И после толку години, Скопје нема место во кое континуирано може да се негува jazz културата. Веројатно, единственото место се вика Универзална сала, и тоа во октомври месец, во вообичаениот термин на Skopje Jazz Festival. Убаво функционираше џез клубот Сачмо (иако само една сезона), во трговскиот центар Буњаковец, под "управа" на еден од најдобрите џез музичари во Македонија, Тони Китановски. Но, и таа приказна заврши.
Чудно е навистина што по скопските кафе-клубови ретко можете да налетате на жива свирка. Не само што нема џез свирки, туку фалат дури и бендови кои во кафе-клубот ќе ги забавуваат посетителите со популарна музика. Се' се сведува на пуштање музика од дискови или грамофонски плочи. По начинот на забава, сите кафе-клубови си наликуваат еден на друг.
Разбијте ја скопската монотонија, вечерва појдете на џез свирка.

Возачи и возачки - пазете се!!!

Како ретко кога, сообраќајната полиција е на улиците во Скопје. Распоредени на секој агол, после секој семафор, на секое место на кое диво се паркира, на сите локации на кои најчесто се поминува улица (а, не е дозволено поминување), ве демнат, чекајќи ја вашата грешка.
Значи, овој пат не се работи за регулирање на сообраќај со цел да се обезбеди побрзо поминување на возилата под придружба. Навистина, во последно време сообраќајната полиција на дело ја гледавме само во таква улога. Но, не! Овој пат е нешто друго во прашање. Овој пат тие се тука за да не потсетат на примерното возење (она, знаете, застанување на црвено светло, пропуштање на пешаци, паркирање единствено на обележан паркинг простор...) и сосема норамално, нашето невнимание или шизиклук да го санкционираат (или народски кажано: да го наплатат).
Значи, внимавајте, иако (од сигурни извори) ова нема долго да трае. Како впрочем и минатиот пат, и тој пред него, и тој пред него...